L'empereur Henri V restitue au monastère de Stavelot le village de Villip qui lui avait été enlevé lors des troubles des deux monastères.
Datierung: 1110 [04]
Ausstellungsort: Cologne
In nomine sancte et individue Trinitatis. Heinricus divina gratia Romanorum imperator augustus Popponi Stabulensis ecclesie abbati cunctisque ejus successoribus. Cum universis Christi Jhesu ecclesiis imperialis providentie cura deesse non debeat, tamen secundum apostolicam institutionem qua domesticis fidei maxime jubemur bonum impendere, eis ecclesiis auxilii nostri suffragium impendius exibere debemus, que sub nostre provisionis tuitione consistunt et pro nostro et totius imperii statu speciali quodam studio orare non desinunt. Noverit itaque tam presentium quam omnis posteritatis nostre sollertia, quod Poppo Stabulensis ecclesie abbas imperialem nostram clementiam frequenti querimonia sollicitavit, eo quod villam unam Wilippe ad prebendam Stabulensium et fratrum pertinentem Warnerus de Kerpene violenter invaderet. Cujus rei proclamationem, quam nos ipsi temporibus progenitoris nostri per abbatem Folcmarum in curia Leodii ventilari audivimus, quid a domno patre nostro responsum diffinitumve sit integra veritate subterminabimus. Defuncto suavissime memorie avo nostro imperatore Heinrico, pupillus pater noster cum totius regni amministratione in tutelam domni Annonis Coloniensis archiepiscopi commendatus est, qui utpote a parvulo facile impetravit ut Stabulensem et Malmundariensem ecclesiam que a principio constructionis sue sub unius abbatis regimine fuerunt disjungeret, Malmundariensis ecclesie prelatum Coloniensibus archiepiscopis investiendum inviolabili decreto sanciret. Que res hoc solum rationis habere videbatur quod ecclesiarum altera id est Malmundariensis intra terminum diocesis sue inveniebatur, altera vero Leodiensis episcopatus fines limitabat. Posito itaque Malmundarii abbate, cepit utraque ecclesia cum totius regni scandalo pro sue partis firmamento vehementer agere, utrobique perturbatis et multis distractis rebus ecclesie. Ita factum est ut Vilippe que in episcopatu Coloniensi erat ad ecclesiam Stabulensem pertinens ab illo intruso et adulterino Malmundariensi abbate in beneficium daretur. Quod discidium cotidianis incrementis validius eousque progressum est, ut patris nostri etas maturior et apertissima miracula que per beatum Remaclum jus suum reposcentem in oculis totius imperii divina majestas operata est, placato domno Annone archiepiscopo, in antiquum statum ecclesias revocarent. Nec longe post, nobis ut predictum est jam adultis fratres cum abbate suo Fulmaro de villa Vilippe proclamantes judicio totius curie eam receperunt, ut quam sine ulla infirmatione legitime possederunt, donec factis in regno partibus, et quibusdam pro nobis agentibus, pro patre nostro quibusdam, jure regni confuso, rursus per vim prenominata possessione privarentur. Qua tempestate per Dei misericordiam sedata et agente nobiscum toto imperio, habita Colonie curia, spoliati fratres rursus proclamabant, et quia nos ipsos proprium et singularem advocatum ipsius ville Vilippe esse probatum est, juxta formam juditii a patre nostro promulgati, redintegrato judicio universorum principum, fratres in predium suum per legatum nostrum Ludouuicum de Hamrestein introduximus. Et ne quamquam deinceps inquietudinem pro jure suo patiantur, rei geste ordinem testamento nostro comprehendimus et ad perpetuam firmitatem sigillo nostro insigniri mandavimus. Data Colonie anno ab incarnatione Domini M° C° X°, indictione III, per manum Alberti cancellarii.