Un noble nommé Boson et sa femme Héluide, à la prière de l’abbé Poppon et des moines de Stavelot, fondent un autel sous la tour dans l’église abbatiale de Stavelot, en lui assignant pour dotation leur alleu de Taverneux.
Datierung: 1118
In nomine sancte et individue Trinitatis. Sciri volo ab omnibus presentis et futuri seculi hominibus, quod ego Boso nobili ortus prosapia et uxor mea Heluidis eque nobilis domnum Popponem abbatem et fratres Stabulenses crebris interpellavi peticionibus, quatinus in ecclesia beati Petri sanctique Remacli in Stabulaus locus ad edificandum Deo altare aptus mihi concederetur, coram quo post universe carnis viam cum predicta uxore mea et filio meo unico Franchone requiescerem. Huic mee peticioni assensu facto, altare sub turri edificatum pro cujus benefitii recompensatione ad communem fratrum usum allodium nostrum in Tauernov cum omni familia ibidem pertinente contradidi legitime in manus et per manus Engonis de Mulaz et Arnulfi de Roche, Hecel de Vilen et Radulfi de Tuez et Arnulfi de Bores. Ea vero conditione dedi, ut quamdiu cum uxore viverem fratribus pro respectu ejusdem allodii singulis annis V sol. solverem in sollemnitate sancti Remigii; defuncto autem uno ex nobis, fratres mediam allodii partem et dimidium familie suis usibus aptarent, qui vero superesset pro altera parte XXX den. solveret die suprascripto; defuncto itaque utroque, totum allodium fratrum arbitrio cederet cum tota familia solvente singulis annis singulos denarios, ita tamen ut VIII solidi ad cotidianum luminare deputarentur ante prefatum altare, et pro requie animarum nostrarum seu genitorum in loco eodem nostri memoria in cotidianis missarum celebrationibus haberetur; heres vero noster in eodem allodio nichil preter advocatiam haberet et eam tali modo, ut jus nullum exigeret, sed si rebellio inibi quisquam esset rogatus a fratribus judicio eundem rebellionem compesceret et sumptum tantummodo cum fratre acciperet. Actum et ratum est anno ab incarnatione Domini M° C° XVIII°, indictione XI, regnante Heinrico V°, Otberto in Leodio presule, domno Poppone in Stabulaus abbate, coram testibus Heinrico advocato, Petro subadvocato, Arnulfo Ueltres, Balduino de Offins, Warnero de Boclenuille, Warnero de Bassines, Steppone et fratre ejus Heinrico de Maneres, Warnero de Borsche, Stephano et Adelardo de Meanz, Gerardo de Tois, et hominibus ecclesie: Reinnero de Longia, Vdone, Cuonone, Herimanno de Longia, Franchone de Baldov et fratribus ejus, Adelardo de Monfort et Nicholao de Longia, Euruino et Adelardo et Anselmo de Stabulaus, et multis aliis.