Albéron II, évêque de Liège, fait savoir à Wibald, abbé de Stavelot, qu’il a obligé son frère Eustache, avoué de Liège, de restituer la terre de Tourinne au monastère de Stavelot.
Datierung: 1139
Ausstellungsort: Liège
In nomine sancte et individue Trinitatis. Albero divina preordinante clementia Leodiensis ecclesie episcopus licet indignus dilecto fratri Wiboldo Stabulensis ecclesie venerabili abbati suisque successoribus in perpetuum. Offitii nostri sollicitudo desiderat, ut loquentes veritatem cum proximo nostro non agamus dolum in lingua nostra, sed que vidimus et audivimus hoc sine ullius acceptione persone testemur. Quocirca calamitati et laboribus Stabulensis ecclesie paterno affectu plurimum compatientes, que de possessione sua Turnines nobis presentibus et pro facultate nostra collaborantibus egerit, presenti scripto nostro ad posterorum nostrorum memoriam transmittere curavimus. Igitur cum Stabulensis ecclesia ex privilegio dive memorie imperatoris Ottonis primi haberet, ne villa sua Turnines eidem monasterio jure antiquo pertines ullius prorsus auctoriate persone in benifitium dari posset, sed victui et cotidianis expensis Stabulentium fratrum perpetuo deserviret, cumque reclamante fratrum conventu prefata villa contra sacrorum canonum instituta concessione quorumdam abbatum de prebenda fratrum ablata esset, domnus Wiboldus abbas Stabulensis Namucensum comitem Godefridum, qui eandem villam injuste habebat, in curia domni nostri Cuonradi secundi serenissimi Romanorum regis proclamavit et prenominatam villam judico curie recepit. Aliquanto vero plus tempore germanus noster Eustachius Leodii advocatus sepe fatam villam Turnines per vim occupavit, hoc scilicet rationis pretendens quod Wigerus de Woromia cujus filiam uxorem duxerat, a predicto avunculo nostro Namucense comite eandem villam in beneficium acceperat Verumtamen nos evidentis justicie ratione commoti, tum ex admontione reverentissimi patris nostri pape Innocentii et jussione pissimi regis nostri Cuonradi secundi, annitentibus sedulo pro Stabulensi ecclesia domno metropolitano Arnoldo sancte Coloniensis ecclesie archiepiscopo necnon Alberone Trevirensi archiepiscopo apostolice sedis legato, non pepercimus carni et sanguini, sed eo usque fratrem nostrum ecclesiastica auctoritate coegimus, ut villam Turnines cum omnibus inde ablatis Stabulensi monasterio restitueret, facta insuper coram nobis promissione quod de eodem bono nullam deinceps violentiam inferret. Quod nos episcopali banno nostro firmavimus, et peticione fratrum nostrorum majoris ecclesie canonicorum per presentem paginam memorie longiori commendavimus. Huic rei interfuerunt : prelati et canonici majoris ecclesie, Fridericus prepositus et archidyaconus, Elbertus archidiaconus et prepositus ecclesie sancti Martini, Dodo archidiaconus et prepositus sancti Bartholomei, Reinnerus archidiaconus et prepositus sancti Pauli, Alexander archidiaconus et custos, Johannes archidiaconus et prespositus in Eche, Reinzo decanus et abbas civitatis, Elbertus abbas sancti Jacobi, Wazelinus abbas sancti Laurentii, Gislebertus abbas sancti Hugberti, Theodericus abbas Walciodorensis, Waltherus Flonensis abbas; interfuit etiam confrater noster Albero Virdunensis episcopus et Odo abbas sancti Remigii Remensis; nobiles et liberi homines : comes Lambertus, Henricus de Rupe, Ebalus de Florines, Wilelmus de Cyunaco, Stephanus de Meanz, Gozuinus de Falconis monte, et alii multi. Actum est hoc publice Leodii in capitolo sancte Marie sanctique Lamberti, anno dominice incarnationis Mo Co XXXo VIIIIo, indictione IIIa, regnante domno Cuonrado secundo, anno regi ejus secundo, ordinationis autem nostre IIIo.