Wibald, abbé de Stavelot, cède à perpétuité l'église de Héron à Azon, abbé de Publémont, à Liège, ainsi qu'à ses successeurs, moyennant un cens annuel.
Datierung: 1136
In nomine sancte et individue Trinitatis. Wiboldus Dei gratia Stabulensis ecclesie abbas dilecto fratri et religioso coabbati suo Azoni de Monte publico in Leodio ejusque successoribus imperpetuum. Si villicus ille evangelicus ore Domini de mammona iniquitatis laudatus est qui fraudem fecisse visus est, et multo magis nos quibus Deus ecclesie sue dispensationem credidit et fidelium oblationibus pietatis opera exercere possumus, ad vere laudis nomen et retributionem tendere debemus. Idcirco hiis et similibus exemplis monitus, si qua ex rebus ecclesie nobis reddite indigentibus ecclesiis sine damno et diminutione possessionum nostrarum impartiri possumus, prompta voluntate et hilari manu facere volumus. Quapropter, venerande frater, concedimus tibi et perpetuis successoribus imperpetuum ecclesiam de Heran pro LXV solid. leodien. denariorum singulis annis in ecclesia nostra solvendis, cujus summe medietatem, in natali sancti Johannis Baptiste infra octavas, alteram vero in natali sancti Lamberti infra octavas persolves. Ea sane condicione, ut sicut tu principaliter more ceterorum investiendorum in nostro, id est in Stabulensi, capitulo donum et investituram ejusdem ecclesie de manu nostra accepisti et nobis sive ecclesie nostre sacramentum fidelitatis jurasti, ita loci cui succedentes sibi provisores nobis sive nostris successoribus idem facientes, eamdem ecclesiam jure et consuetudine nostre ecclesie accipiant. Statutum est etiam cum totius capituli assensu, ut ab hodierna die et deinceps successores tui in suo introitu, relecto presentis charle in presentia fratrum privilegio, prefate ecclesie donum sub prescripta condicione et pacto, nulla interposita exactione vel precio, sine munere suscipiant, ea cum ratione ut omnem consuetudinem ceterorum investitorum nobis sive nostris successoribus tam in judiciis super pares suos promovendis quam in provincialibus synodis nobiscum adeundis exsolvant. Concessimus quoque tibi ut ejusdem ecclesie fructum, prout utilius potes, usibus et commodo fratrum tuorum aptes, salvo tamen in omnibus episcopali jure. Tu eciam et successores tui quecumque ad episcopalem vel synodalem justiciam vel servicium vel usus ecclesie pertinent sine nostro supplemento exsolves. Ceterum si quid de prescriptis condicionibus per te vel tuos turbatum vel immutatum vel irritum fuerit, vel si prenominatam pecuniam constitutis diebus solvere neglexeris, postquam a nobis per nostros clericos investitos usque tercio commonitus fueris, nisi ex jure et justicia neglectum corrigere et legibus componere volueris, ecclesia et omni ejus beneficio sine omni recuperatione carebis. Verum utcumque res sese futuris temporibus mutent, cum nos libi hanc ecclesiam, ut pretaxatum est, concessimus, due portiones decimationis ad vestiarium fratrum nostrorum pertinebant, tercia pars ad prebendam presbiteri ejusdem ecclesie pertinebat. Actum est hoc anno sub incarnatione Domini M° C° XXXVI°, indictione XIIII, in presentia domni Wiboldi abbatis, anno ordinationis sue sexto, regnante domno Lothario III° Romanorum imperatore augusto, Alberone electo in Leodio. Testes de fratribus sunt a : Warnerus prior, Arnulphus prepositus, Erleboldus cellerarius, Cono camerarius, et omnis ejusdem loci congregatio; de laicis vero : Anselmus villicus et frater ejus Adelardus, Albricus et frater ejus Condricus, Ebroinus, Erchembertus, Franco de Francorchamp, et alii ecclesie mulli filii.