König Arnolf schenkt seinen Besitz zu Thiengen an Abt Pernhart.
Datierung: 888 05 29
Ausstellungsort: Lunsaee
† In nomine sanctae et individuae trinitatis Arnolfus divina favente gratia rex. Si famulorum Christi vel sacerdotum supplicationes, quas tam pro ecclesiae sibimet commissae, quam sua utilitate nobis suggesserint, auribus nostris pie accommodamus et de terrenis profectibus eis opem ferre non denegamus, non solum in hoc regalem morem perpetramus, verum etiam eos ad nostrae orationis exercemus devotiores instantiam, et tamen aeternae salutis proemia feliciter obtinenda hoc nobis profuturum esse liquido credimus. Idcirco noverit omnium fidelium nostrorum, praesentium scilicet et futurorum cautela, qualiter venerabilis abba noster de monasterio sancti Galli confessoris, nomine Pernhart, per Asperti custodis et cancellarii nostri interventum mansuetudinem nostram precatus est, postulans, ut quasdam res iuris nostri in Alamannia consistentes diebus vitae suae in proprium sibi concessissemus, statimque nos pro Dei amore necnon ob venerationem illius voluntati suae libenter assensum praebentes decrevimus ita fieri. Dedimus enim ei in pago Prisihgouvi noncupato, in comitatu Wolfunes, quicquid in loco, qui Tuginga vocatur, ad nostrum dominium habuisse videbamur, cum omnibus appenditiis suis totis vitae suae diebus in proprietatem, cum curtibus ac domibus aliisque aedificiis, ecclesia, mansis, mancipiis utriusque sexus, campis, agris, pratis, pascuis, silvis, vineis,. aquis aquarumve decursibus, molendinis, piscationibus, viis et inviis, exitibus ac regressibus et adiacentiis, finibus, cultis vel incultis, mobilibus et immobilibus, quaesitis vel inquirendis cumque omnibus pertinentiis illuc iure ac legitime respicientibus. Et iussimus hoc nostrae auctoritatis inde conscribi praeceptum, per quod decernimus regioque sancimus imperio, ut praescriptus fidelis abba noster haec omnia diebus vitae suae secure habeat, teneat atque possideat. Liberaque largitionis nostrae potestate post eius discessum ad idem coenobium tam in parentum nostrorum, quam in nostram commemorationem ad usus fratrum ibidem divina semper obsequia persolventium contradimus, qua- tinus illuc salva integritate in aeternum solummodo in sustentationem servorum Dei pertineant absque ullius obstaculo. Et ut haec auctoritas nostra inviolabilem in Christi nomine obtineat stabilitatem, manu nostra subtus eam firmavimus anuloque imaginis nostrae iussimus insigniri. Signum domni Arnolfi M serenissimi regis. Aspertus cancellarius ad vicem Theotmari archicappellani recognovi et subscripsi. Data IIII kal. iun., anno dominicae incarnationis DCCCLXXXVIII, anno autem primo regni domni Arnolfi serenissimi regis, indictione VI. Actum Lunsaee in Dei nomine feli- citer. Amen.