Donation par Guérin Le Preux, Hamelin de Montfoucauld et Hugue du Buleu de places de maisons sises près de la chapelle du château.
Datierung: 1120
Notum sit... quod Guarinus, cognomento Probus, per ammonitionem et deprecationem Juhelli, domini Meduane, dedit Deo et beato Martino Majoris monasterii et monachis ejus, pro anima sua et parentum suorum, plateam sive aream domus sue quam habebat juxta capellam in eodem castro, solutam et quietam ad faciendas ibidem officinas monachorum, videntibus et audientibus Walterio Compendiensi, monacho Majoris monasterii, et Algerio cementario et monachis ejusdem loci; de clericis, Odone de Melereio presbytero, Hugone filio Hamelini capellani; de laicis ipso Juhello, domino castri, Gaufredo filio Odonis siniscalco et Willelmo filio ejus, Hamelino de Montefulcaldi et Willelmo fratre ejus, Petro de Oissello, Guarnerio filio Bonelli in cujus domo hoc factum fuit. In eodem loco et eadem hora et pro eisdem causis et sub eisdem testibus dedit similiter Hamelinus de Montefulcaldi, concedente Willelmo fratre suo, plateam suam solutam et quietam eidem sancto et eisdem monachis, similiter ad faciendas officinas eorum. Hugo autem de Buslo alia quidem die et alio loco, id est in camera aule domini Juhelli, similiter per ammonitionem et deprecationem ipsius domini, dedit Deo et supradicto sancto et monachis ejus plateam suam solutam et quietam, sitam similiter juxta predictam capellam, et hoc fecit pro anima sua et parentum suorum. Hoc viderunt et audierunt Willelmus de Ossello, prior Meduane, et Walterius Compendiensis, ambo monachi Majoris monasterii; Achardus, monachus de Lonleio, ipse Juhellus, dominus Meduane, Mauricius de Gorram, Osmundus Piscis.