Idem quoque fidelis dispeneator et prudens, sustentationi fratrum in Aldenmunster decimas in Rorheim contulit, et libros moralium in Abrinsberg privatus adhuc conscribi fecit, homo mirae continentiae et plane vir consilii, si meliora invenisset tempora. Qui delato apostolicae sedis privilegio, insequenti depressus infirmitate viam ivit universae carnis, anno regiminis sui septimo. Sepultus est in aecclesia principali, in ipso occidentali introitu, in latere exeuntium dextro. Anima eius requiescat in pace. Amen.
Sub huius patris tempore, quidam dei famulus Adalbertus nomine, ex laico monachum induens, templum laureshamense tum parvitate tum vetustate dignitati suae minime respondens, deo cooperante renovavit et augmentauit, et ut in presentiarum cernitur, fornicibus, absidibus, fenestris, laquearibus, tecto plumbeo venustauit. Preter hec etiam fratrum utilitati consulens, duas huobas cum area in Winenheim sitas, multa pecunia ab heredibus comparatas, itemque curiam cum vineis in Hephenheim ipsorum victualibus adiecit. Decimas etiam in Winenheim cum molendino dominicali, et decimas in Hentscuheslieim ne beneficiarentur, ab ipsis hiantium faucibus dato precio redemptionis extraxit, aliisque compluribus circa eandem aecclesiam bene meritis, memoriam in benedictione promeruit. Per idem tempus Billungus vir nobilis de
Lindenvels
, ecclesiam in vico Cella cum vinea proprietatis sue, et parte montis Hemmingisberg que contra eundem vicum respicit, quamque abbas Folcnandus ad novellandum concesserat, fratrum usui tradidit et ut eorum providentia, tribus in ebdomada diebus in eadem aecclesia divina celebrarentur instituit. Qui videlicet Billungus, cum in obpressione laurensis familiae modum excesserit, eo tamen vel solo cum villico iniquitatis laudandus est, quod de rebus domino fraudulenter subtractis in aliquo pro se prudenter fecit. Eius donatio talis est.