Datierung: 968 (967?) 12 02
Ausstellungsort: Leutershausen publice.
Ego in dei nomine Rathere, et uxor mea nomine Eggeburg, donamus ad sanctum dei mrem. Nazarium, qui requiescit in corpore in pago renense, in monasterio Lauresham, super fluvium Wisgoz, ubi uenerabilis abbas Gerbodo regulariter preesse videtur, quicquid in Hantscuesheimero marcha visi sumus habere, cum omnibus iuste ac legitime illuc pertinentibus, terris et locis, curtilibus, agris, pratis, silvis, campis, pascuis, aquis aquarumve decursibus, cultis locis et incultis, mobilibus rebus et immobilibus, viis et inviis, exitibus et reditibus, nichil extra pretermittentes, sed omne quicquid dici aut nominari potest, de proprio iure in ius et dominium prefati mris. rectorumque ipsius monasterii transfundimus, perpetualiter possidendum, ea scilicet ratione ut a die presente possideant et excolant, et liberam ac firmam in omnibus potestatem habeant, absque preiudicio et inquietudine alicuius, commutandi, distrahendi, vel quicquid sibi libuerit inde faciendi. Econtra vero ex prefati abbatis et fratrum suorum benivolentia et consensu in beneficio recepimus in Liuthereshuson IIIes hobas et dominicalem decimationem, et in Niwenheim IIIes hubas et dimidiam, et decimationem ad eandem aecclesiam pertinentem, hoc videlicet pacto, ut deinceps nichil omnino prenominatarum rerum nobis vendicemus, sed in usus monasterii statim conferamus; illas vero res quas in beneficium accepimus, ad dies vite nostrae sine impedimento et contradictione habeamus et possideamus, et nichil inde minuere aut deteriorare aliquem permittamus, sed augere et meliorare in omnibus studeamus. Post decessum uero utriusque nostrum, memoratae res cum omni integritate ad predictum revertantur monasterium. Actum publice in Liuthereshuson, IIII non. decemb., anno ab incarnatione domini DCCCCoLXoVIIIo. Indictione XIa. Regnante Ottone imperatore augusto anno XXXoIIIo, imperii autem eius VIo. Signum Ratheri et uxoris eius Eggiburgae. Signum Gerbodonis abbatis. Signum aduocati Liutheri, et advocati Burchardi, et aliorum. Ego Salemannus indignus monachus et diaconus scripsi, diemque et tempus ut supra notavi.