Datierung: 956 03 05
Ausstellungsort: Frankfurt
In nomine sanctae et individuae trinitatis. Otto dei gratia rex. Notum sit volumus omnibus fidelibus nostris presentibus scilicet et futuris, quod nos pie et salubriter de statu regni nostri tractando, ob interventum dilectae coniugis nostrae Adelheidae, venerabili sanctae laureshamensis ecclesiae abbati Gerbodoni ad utilitatem fratrum ibidem deo deservientium, in quadam eiusdem cenobii villa quae Basinesheim dicitur publicas mercationes fieri concessimus. Et ut hoc munificentiae nostrae munus eidem abbati suisque successoribus stabile et inconcussum permaneat, nec ab aliquo per succedentia tempora valeat infirmari, hoc presens preceptum conscribi, et anuli nostri impressione signari iussimus, et manu propria subtus firmavimus. Signum domni Ottonis M. serenissimi regis. Liutolfus ad uicem Willehelmi archicapellani recognoui. Data IIIa non. martii. Anno quo supra. Actum in Franconofort, feliciter, amen.
Idem ipse privilegium libertatis eidem monasterio tertio confirmavit, imperator iam ordinatus.