Hugues, prévôt, et Gérard, doyen de l’église de Notre-Dame-aux-Degrés, à Cologne, font savoir que l’union de fraternité est renouvelée entre leur église et celle de Malmedy.
Datierung: 1179
In nomine sanctae et individuae Trinitatis. Hugo Dei gratia praepositus ecclesiae beatae Alariae quae est Coloniae in Gradibus, Gerardus decanus successoribus suis in perpetuum. Notum sit tam praesentibus quam futuris nos justae petitioni Malmundariensium fratrum acquievisse et fraternitatis unionem inter ecclesiam nostram et suam prius habitam, sed diuturnitate temporum antiquatam et negligentiae incuriositate sepultam, propter beatum martyrem Agilolphum nostrae et suae communem et gloriosum patronum reformasse, et eos in orationum ecclesiae nostrae suffragio et eleemosynarum nostrarum beneficio, officio et auxilio nunc et perenniter suscepisse et nos viceversa suis orationibus, beneficiis et eleemosynis tam vivos quam defunctos fideliter communisse, sed cum fragilitatis humanae memoriae rerum temporalium diversitate occupata et frequentium circumstantiis cogitationum onerata, nisi scripti testimonio roboretur, labilis sit et caduca, ad perpetuam succedentium memoriam hanc societatem imagine presentis scripti renovamus et mentis sinceritate et omnimoda devotione confirmamus; et ut hoc testimonium diligenter in utraque ecclesia, sicut res memoria digna conservetur, sancimus appositis in monumentum utriusque ecclesiae sigillis, quatenus qui in utraque oramus pro invicem ut salvemur, praefati patroni nostri fulti patrocinio ad consequendam salutem quam quaerimus adjuvemur. Actum est hoc anno Dominicae incarnationis M. C. LXX. IX., regnante Friderico Romanorum imperatore augusto, Philippo Coloniensi archiepiscopo, abbate Erleboldo Malmundariensi et Stabulensi praesidente loco hujus renovatae societatis. De fratribus nostris testes hi sunt : Gerardus decanus, Wolframius, Joannes custos, Arnoldus camerarius, Tyricus de Reutesberck; et de Malmundariensibus : Albertus decanus, Heribrandus, Mauritius, Henricus, Joannes, Cuno, Bovo; et multi utriusque ecclesiae filii.