Les religieux de Corbie prient leur abbé Wibald de confirmer, par un acte écrit, l’accord de confraternité qu’ils ont conclu avec les religieux de Stavelot et de faire honorer dans les deux monastères leurs patrons réciproques.
Datierung: [1148, avril – juin ?]
Dilecto patri ac domino suo Wibaldo Dei gratia venerabili Corbeiensi abbati E. prior totaque congregatio filiorum suorum, Deo in eodem monasterio sub ejus regimine famulantium, quidquid valent sedula oratione et debita tam dilecto patri dilectione.
Mullum quidem egre sustinemus tam diuturnam vestri absentiam, nisi quod pro incremento ecclesiae nostrae vos scimus in hac absentia laborare; ad quem etiam laborem viriliter sufferendum vos, in quantum presumimus, exhortamur et commonemus et, ut bono fine terminetur, misericordiam Dei jugiter exoramus. Ceterum gratias agimus vestrae paternitati, quod inter duos parietes, ut eos in unam societatem conjungeretis, tanquam prudens imitator veri illius angularis lapidis medius sedistis, et diu desideratam nobis karissimorum fratrum communionem et optabilem in Christo adunationem ad effectum perduxistis. Consummato ergo operi extremam manum adhuc imponetis, ut videlicet vestro privilegio, quae in hac memorabili duarum aecclesiarum conjunctione vestra permissione utrimque scripta vel facta sunt, ad perpetuam successorum nostrorum memoriam confirmetis et hoc testimonium in utraque aecclesia diligenter, sicut rem dignam memoria, conservari precipiatis. Nichilominus quoque rogamus, ut, quoniam ad laudem Dei et ad remedium animarum nostrarum hanc conjunctionem fieri postulavimus, sanctis etiam patronis utriusque ecclesiae alterutrum dignos honores inpendi constituatis, quatinus, qui in utraque aecclesia oramus pro invicem ut salvemur, junctis utrimque patrociniis ad consequendam salutem quam querimus adjuvemur. Placeat ergo vobis, ut ob recordationem posteritatis signum aliquod et memoriale in festivitate utriusque patroni de possessionibus utriusque ecclesiae statuatis et hoc studio pietatis tam vestram quam patronorum memoriam apud subditos vestros perpetuam faciatis.