Wibald, abbé de Stavelot, déclare à Héribrand de Logne et à ses successeurs dans la garde du château de Logne, qu’ils n’auront plus la collation des églises de Logne et de Mont-Saint-Rahy, mais seulement le droit de présentation à ces bénéfices.
Datierung: 1133
Ausstellungsort: Stavelot
In nomine sancte et individue Trinitatis. Wiboldus divina misericordia Stabulensis abbas Heribrando de Longia et successoribus suis. Utiliter satis ac provide rerum gestarum ordo ad notitiam futurorum scripto transmittitur, ne per ignorantiam legi . . . . . . . permutetur. Unde noverit omnis nostra posteritas, quod tu tam tibi quam successoribus tuis ecclesiam que est in villa Longie et eam que est in Monte Sancti Rainheri ab antecessoribus nostris, domno videlicet Cuonone abbate et domno Johanne abbate, jure feodi obtinueras, pro supplemento beneficii quod pro eo habes, et semper et jugiter in castello nostro Longia maneas, ita videlicet ut, quotienscumque supradicte ecclesie defunctis sacerdotibus vacarent, tu manu tua ipsa ecclesias dares et personam ad investituram altaris per te conduceres. Verum nostro tempore, defuncto fratre Roberto presbitero qui easdem ecclesias habuerat, nos nullis precibus, nullo consilio . . . . . potuimus, ut ecclesiarum possessionem a laico dari concederemus; sed quia te tamquam virum bonum ac fidelem multum diligimus et tam heredes tuos quam te in mansione castelli nostri conservare voluimus, ex consilio fratrum nostrorum et hominum, ecclesie utilitati et honori tuo aliter providere curavimus. Concessimus enim tibi et presenti scripto jure perpetuo firmavimus, ut tuum sit, vacantibus prefatis ecclesiis, personam idoneam et canonicam nobis vel successoribus nostris ad investiendum presentare, nec liceat aliquando nobis vel alicui abbatum personam que a te vel heredibus tuis exibita fuerit aliqua conditione vel exactione gravare aut retardare, sed sine ulla pactione eidem persone prenominatas ecclesias sua manu dent et, sacramento fidelitatis accepto, ad donum altaris suis litteris ac testibus conducant. Quod si quis constitutionem nostram aliquando labefactare et violare temptaverit et, te invito, personam aliquam in sepedictis ecclesiis intruserit, offensam Dei et beatorum apostolorum Petri et Pauli et sancti Remacli in tremendo judicii die incurrat. Actum est Stabulaus anno dominice incarnationis M°C°XX°Xlll°, regnante domno Lothario III° Romanorum rege, Alexandro in Leodio presule. Testes de fratribus sunt : Warnerus decanus, Rodulfus custos, Heribrandus cellerarius, Hozelo cantor; de laicis vero : Nicolaus de Longia, Adelardus frater ejus, Widricus de Villa, Widricus Albus, Widricus Niger, Anselmus villicus, et alii multi.