Acte rapportant comment, sous l’abbé Poppon, le monastère de Stavelot acquit de l’abbaye de Saint-Martin-devant-Metz, le village de Waldorf en échange de celui de Medernach au comté de Bidbourg.
Datierung: [Vers 1089]
In nomine sancte et individue Trinitatis. Notum sit omnibus tam futuris quam presentibus quale concambium factum est inter domnum Popponem abbatem quondam Stabulensis cenobii et Nantherum abbatem de monasterio sancti Martini quod est in episcopatu Metensi. Hic Nantherus abbas quoddam bonum habuerat in comitatu Oththemedensi , villam scilicet Walendor vocatam respicientem ad altare sancti Martini; de qua, quum a loco longe aberat versus Coloniam, nullum servitium, nullum poterat habere respectum, sed in tantum ad nichilum jam venerat, ut nichil census, nichil servitii preter VIII solidos ipsa solveret curtis que plus XXX mansis constabat, de quo etiam censu ipsi abbati contrarium ab ipsis debitoribus evenerat. Super qua re cum frequenter imperatoriam majestatem quereret et quod sibi vel loco utile esse invenire non posset, proposuit sibi super hoc agi consilium, si fortuna prosperum sibi subministraret locum. Erat tunc temporis domnus Poppo bone memorie abbatias curam Treveris sancti Maximini, Stabulaus sancti patris nostri Remacli, qui cum ipsi regi et multis principibus notus esset et carus, ipsi etiam predicto abbati familiaris erat amicus. Hunc igitur adiit, super jam dicto dampno quesivit consilium, et tandem ipsius domni Popponis consilio visum sibi est ut supradicti boni a se fieret commutatio. Animadvertens itaque aliquid de bono sancti Remacli adjacere prefatam quoque curtim Stabulensi cenobio vicinam esse, bonum sibi visum est eandem commutationem cum ipso domno Poppone facere. Quod ipse libenter annuit, tradens ei in comitatu Biendenborch villam sancti Remacli Medrenai vocatam cum omnibus appenditiis suis, terris silvis, aquis, omnibusque inde procedentibus debitis. Facta est autem hec commutatio apud Diuillam, ubi colloquium fuit inter imperatorem Cuonradum et Heinricum regem Franchorum, ducatum Hlotariensis regni tenente duce Gozilone, eodem super bono sancti Martini advocato, super bono sancti Maximini comite Heinrico, super bono sancti Remacli fratre ejus comite Frederico, regente domno Poppone episcopatum Trevirensem, Piligrino Coloniensem, Theoderico Metensem, Reinnardo Leodiensem. In unum igitur advocatis convenientibus, dux Gozilo tradidit predictam Walendorp comiti Friderico in usum fructuarium cum omnibus appenditiis suis ad altare sancti Petri sanctique Remacli. Item comes Fridericus Madrenai cum appenditiis suis eodem conventu duci Goziloni ad altare sancti Martini, presentibus memoratis abbatibus qui ipsam agebant commutationem. Placuit postea abbati Nanthero a predicto abbate Poppone eandem Medrenay de villa sancti Maximini Lucey vocata commutare, quod et fecit presentibus advocatis supradicta ratione. Confirmatum est autem hoc concambium precepto Cuonradi imperatoris et legali advocatorum banno ac justa traditione habitum a predictis abbatibus per annum et diem digna census ac servitii solutione. Testes fuerunt: Becelinus comes de Biendeburch, Godefridus comes de Amblauia, Gozilo comes de Engeis, Gerardus Flamens , Herimannus de Gruosles, Theodericus et Riquinus de Lembruch, Hezel fidejussor de Budelei, Harpero et Roricus de Petra, Arnulfus de Aisno, Stephanus de Malenpreth, Razo de Mecuenles, Arnulfus de Verino.