Le pape Sylvestre II prend sous sa protection les monastères de Stavelot et de Malmedy et prescrit que, lors de l’élection d’un abbé, on choisira de préférence un religieux de Stavelot, s’il se distingue par ses mérites et son savoir.
Datierung: 999 - 1003
Silvester summus et universalis papa et beati Petri vicarius servus servorum Dei. Venerabili Stabulensium et Malmundariensium abbati Rauengero et omnibus in Christo pie vivere volentibus veram in Domino Jhesu dilectionem ac mutuam fraterne caritatis unanimitatem. Cum constat post primorum nostrorum parentum prevaricationem in liberi arbitrii abusionem genus humanum ei sententie addictum, ut et homo capitibus aliorum secundum psalmographi vocem superponatur, ad compescendos scilicet humane voluptatis illicitos appetitus et legibus non modo forensibus, verum etiam ecclesiasticis cohibeamur regulis ac rationibus, eousque progressa est autoritatum institutio, ut sancta sanctorum loca que devotione fidelium fundata, cultui divino mancipata, plura a diversis stipendiorum eximia sunt adepta, non solum regalia sed imperialia ad immunitatem sui expostulent precepta, verum etiam auctoritatis nostre ad stabilitatem sui desiderent privilegia. Quapropter rogatu venerabilis Notgeri Leodicensis episcopi, abbatiam Stabulensem vel Malinundrensem antiquorum regum et imperatorum munificentia nobiliter constructam et semper tam nostrorum predecessorum auctoritate quam regia immunitate defensam, sub eadem immunitatis nostre tuitione abbatem semper habeant, ea tamen preponderante ratione, Malmundrensium pace, ut quia beatus Remaclus, utriusque monasterii constructor et Tungrensium antea episcopus et pastor, maluit in altero eorum, id est Stabulensium, locum sepulture sibi diligere, ipsi primam electionis obtineant vicem, si apud eos melior meritis et instructior litteris inveniatur. Si autem non illic sed Malmundarii melior reperiatur, utrique loco prefitiendus potius quam externis assumptus intromittatur.