Le roi Otton I, à la demande de l'abbé Odilon, accorde aux religieux de Stavelot et de Malmedy la libre élection de leur abbé commun.
Datierung: [937-954]
In nomine sanctae et individuae Trinitatis. Otto divina praeveniente clementia rex. Si regalis majestas abbatum ac monachorum Deo servientium utilitatibus benegnitatis suae munere excreverit, eorumque necessitatibus pie consulere studuerit, id omnimodis ad emolumentum animae suae proficere non ambigat. Idcirco comperiat omnium fidelium sanctae Dei aecclesiae nostrorumque praesentium scilicet et futurorum industria, qualiter quidam abbas nomine Odilo ex monasteriis Stabelau videlicet et Malmundaria quae sunt constructa in honore sancti Petri apostolorum principis, in quo superiore sanctus requiescit Remaclus confessor et episcopus, adiens celsitudinem mansuetudinis nostrae postulavit nobis quatinus concederemus suis monachis inibi Deo militantibus electionem regularem ac confirmaremus nostrae praeceptionis auctoritate. Cujus peticioni justae rectaeque pie annuentes libenti animo assensum praebuimus, et ut ista concessio et justa confirmatio perhennem optinere valeat in Domino firmitatem, hoc nostrae mansuetudinis edictum fieri censuimus, per quod statuentes decernimus modisque omnibus sanccimus, ut monachi qui in praedictis coenobiis nunc et deinceps divinis famulaverint officiis, habeant ex semet ipsis secundum sancti Benedicti institutionem abbatis electionem qui secundum sanctae religionis formam ambobus praesit monasteriis, quia olim, antequam praefatus abba ibi ordinatus fuisset, audivimus ea per pecuniae amorem sub cura praepositorum ab invicem fuisse separata, quod nostro prorsus imperio fieri prohibemus, ut nullus per pecuniae falsitatem aliquam introducere in eisdem audeat personam, sed juxta antiquorum patrum instituta regulariter eligant sibi abbatem, quatinus in divinis cultibus indesinenter permanentes pro salute regni nostri misericordiam Dei attentius implorare valeant. Et ut haec praeceptio maneat inviolata et in perpetuum corroborata, manus nostrae descriptione subter eam signavimus. (L. M.)