Thierry III, roi des Francs, à la demande de l’abbé Goduin, confirme aux monastères de Stavelot et de Malmedy leurs immunités.
Datierung: [Vers 681]
Theodericus rex gratia Dei. Principalis serenitas semper in cuncto debetur prospicere, precipue peticionibus sacerdotum que rite poposcerint benigno animo suscipere et ad effectum perducere, ut de optinendo benefitio valeant gratulari et eis delectet melius pro regni nostri statu attentius Dominum deprecare. Ideoque venerabilis vir Goduinus abba de monasteriis Stabulao et Malmundario, que bone memorie avulculus noster Sigibertus quondam rex ob amorem Christi in foreste fisci Arduenna super fluvium Amblaua in honore sancte Marie semper virginis genitricisque Domini nostri Jhesu Christi et sanctorum apostolorum Petri et Pauli et ceterorum sanctorum dinoscitur edificasse, clementiam nostram petiit, ut de omni facultate ipsorum monasteriorum tam quod ipse princeps ob id noscitur delegasse quam etiam quod a reliquis christianis hominibus ibidem noscitur fuisse collatum, tam quod ad presens in quibuslibet locis aut territoriis tam ultra Ligerim quam citra possidere videntur, seu quod ibidem in Dei nomine a christianis hominibus fuerit additum aut condonatum, pro quiete ipsorum monasteriorum integra emunitate inibi concedere videremur. Cujus propter reverentiam ipsorum sanctorum seu mercedis nostre emolumentum vel considerato sacerdotio ipsius domni Goduini ac fidei sue respectu quo erga regimen nostrum fideliter videtur desudare, gratanti animo prestitisse peticionem vestra comperiat magnitudo. Per hoc ergo preceptum decernimus ordinandum et perpetualiter volumus esse mansurum, ut nullus preelectus quolibet modo judiciaria lege accinctus, in curtis ipsorum monasteriorum quo adpresens eorum manet dominatio vel possessio aut quod ibidem inantea fuerit additum vel condonatum, in eis ad causas audiendas seu fideijussores tollendum aut freda exigendum nec mansiones faciendum nec ullas paratas aut quaslibet reddibitiones exagitandas penitus ingredi presumat, sed omnes facultates ipsorum monasteriorum ut superius diximus, tam quod in cenobiis aut in quibuslibet locis aut in territoriis eorum videtur possessio vel dominatio vel quod ibidem fuerit donatum, et absque introitu judicum remote et resignate ab omni respectione de partibus fisci sint, ut tam nostris quam futuris temporibus inconcusso jure valeant possidere, quo saluti eorum et nobis in magnum benefitium proveniat et ipsis servis Dei in ipsis monasteriis consistentibus melius delectet pro regni nostri constantia Domini misericordiam deprecari. Et ut ratum et inviolabile nostris et futuris temporibus permaneat, manus nostre inscriptione subter annotari fecimus.
Signum domni Theoderici regis (L. M.).