Formulae - Litterae - Chartae: Leseumgebung

Salzburger Urkundenbuch (Ed. Hauthaler); Breves Notitiae, Nummer 1

[De constructione ecclesie iuxta lacum Walarsee]

Primo igitur Theodo dux Baicariorum dei omnipotentis gratia instigante et beato Rudberto episcopo predicante de paganitate ad christianitatem conversus et ab eodem episcopo baptizatus est cum proceribus suis Baioariis. Item Theodo dux dedit ei potestatem circuire regionem Baioariorum et eligere sibi locum ad episcopii sedem et ecclesias construendas et ipsos populous ad servitium dei erudiendos cum adiutorio dei et sui ipsius supplemento. Prefatus igitur beatus Rudbertus multa circuiens loca pervenit tandem in pagum Iuuauensem iuxta lacum vocabulo Walarsee, ubi exit Fischaha de eodem lacu, consedit ibi et construxit ecclesiam eamque dedicavit in honore beati Petri apostolorum principis. Hoc facto beate memorie Theodo dux tradidit ad ipsam ecclesiam eundem locum cum confinio circumiacenti in aquis aquarumque decursibus silvis pratis pascuis et molendinis atque piscationibus, curtem et casam cum ceteris edificiis, servos manentes in coloniis IIII et alios tributales manentes in coloniis decem.