Chartes et documents de Saint-Bénigne de Dijon. Prieurés et dépendances des origines à 1300. Tome premier., 135
Datierung: Entre 894 et 910
Argrimus episcopus, in aucmentatione rerum hujus loci ferventissimus, donavit ad communem utilitatem fratrum abbatiam sancti Johannis, quam quidam Fulbertus monachus beneficiario jure tenebat. Concessit et mercatum annuale ad vestimenta fratrum emenda, medietatem que ad se pertinebat. In Aziriaco etiam villa decimas et paratam et omnes redditus ipsius aecclesiae, que tunc cella erat monachorum hujus loci, supplicante Lanterio abbate, ad usus eorumdem monachorum perdonavit. Similiter fecit de aecclesia que est in Longovico et de capella que est in Prunido, quam deputavit ad servitium infirmorum; et aecclesiam suprascriptam sancti Johannis ad servitium hospitum. Reddidit insuper mansa XVII1I in diversis locis, que tempore Teutbaldi episcopi, antecessoris ejus ablata fuerant, et in beneficium data cuidam Vuidoni. De his omnibus que premisimus fecit privilegia episcopali auctoritate, contestans et monens succedentes pontifices ut hanc a se factam eleemosinam paterno affectu inlibatam custodiant, quatinus orationes et vota famulorum Dei in hac domo consistentium, tam ipsis quam ceteris fidelibus vivis atque defunctis sint proficuae ante Deum. Qui vero de his aliquid suptraere aut beneficiare vel quoquo modo auferre conatus fuerit, anathematis gladio percussit, nisi resipuerit.
... Qui, inter plurima que huic monasterio contulit beneficia, haec quoque ex suo superaddidit, medietatem scilicet annualis mercati quod est in festivitate omnium sanctorum, ad vestimenta fratrum; quoniam alia medietas jam data fuerat sancto Benigno largitione Karoli regis, quando eidem donaverat Burgum pariter et districtum; Duarum quoque decimas et paratas ecclesiarum in Asiriaco et in Longovico consistentium ob diem anniversarium depositionis sui corporis ibidem quiescentis, necnon et requie cunctorum Lingonensis ecclesie pontificum eleemosinario et solemni officio celebrandum; Prunidum quoque villam cum ecclesia et adjacente silva administrandum hiberno tempore infirmis fratribus focum; Adjecit preter hec abbatiolam sancti Joannis ipsi loco contiguam, cum omnibus appendiciis suis ad exceptionem hospitum.